Gabay Hooyada uurka leh ku saabsan (Uurrey) Abwaan Shiine

gabaygaan wuxuu ka hadlayaa hooyada uurka leh iyo waxyaabaha looga baahanyahay.

1. Afo iyo marwadii reer leh oo, weliba uurrey ah
2. Wax aan oran lahaa baa jiriyo, erayo waawayne
3. Ahlan dhaha tix aan soo unkaan, eegga furayaaye

4. Si aan ubadka kiinood dhasheen, cudur u aafaynin
5. Aqoontiyo waxaa aragtideey, ila habboonaatay
6. In intaysan awalkeeda hore, gabadhu uuraysan
7. Adeeg caafimaad oo il-tiran, loo abaabulo e
8. Oo si aad ah iyo weliba aad, loo agaasimo e

9. Ammintiyo waqtiga uurku waa, lama illaawaane
10. Hooyada wax lagu aamminaay, eego danahaaga
11. Isbitaal inaad booqatiyo, goob adeeg wacan le
12. Ood Emsii Ejyada gaarto waa, kuu ekoontahaye
13. Il sideedi baa ubadka yaal, ubuc la dhowraaye
14. Kaniinigii kastood aragto iyo, quudka idilkiisa
15. Afka lalama aadoo dib bay, eel ka dhaliyaane
16. Ilmaheey wax yeellaynayaan, saan ogsoonnahaye
17. Ha il-duufin oo Oori noqo, sharaf le loo aayo

18. Anfacada intii dheef leh iyo, oonka waxa reeba
19. Allayl iyo aroor noolba waa33, lagu aqdaamtaaye
20. Adigoon intaa iyo intaa, kala illaawaynin
21. Isbitaal inaad booqatiyo, goob adeeg wacan le
22. Ood Emsii Ejyada gaarto waa, kuu ekoontahaye
23. Ha il-duufin oo Oori noqo, sharaf le loo aayo
24. cudurro dhaliyaa jiroo, jara arwaaxdaaye
25. Aqoon bay rabtaa iyo tartiib, aan il-duuf jirine
26. Adayg kama dhigee jeer hadduu, Eebbe kala keeno
27. Canuggoo abaydina haddaad, ooyintiis maqasho
28. Afkoo naaska loogugu duwuu, ku istiraaxaaye

29. Aammus iyo markaasuu karaa, aayar meel hurude
30. Adigoon intaa iyo intaa, kala illaawaynin
31. Isbitaal inaad booqatiyo, goob adeeg wacan le
32. Ood Emsii Ejyada gaarto waa,kuu ekoontahaye
33. Ha il-duufin oo Oori noqo, sharaf le loo aayo

Abwaan Calinuur Shiine gabay 2020