gabay jacayl Abwaan Shiine

Gabaygan waxa uu soo baxay 2020-kii. Waa gabay jaceyl ah balse qofkii akhriyaa inuu si kale u fahmo ayaa laga yaabaa. Gabayga dhexdiisa waxaa ku jira dhowr hummaagood oo si cajiib ah u muujinaya in jaceylkaan qofku uu hayaa uu yahay qof ku sugan. Tusaale, bal malee adoo gacan ka naafo ah oo meel geel ku haya isla markaana habeen oo madow inta isku duway u arooriyay ceel aan dhaweyn oo markuu waagu beryay dul geeyay ceelkii uu ka shubi lahaa. Marka uu xaal halkaas joogo geela waxaa shubi kara ninkii laba gacmoodin kara oo calaashaan labo gacmood leh balse qof mid ka mid ah ka naafo ah ma awoodo inuu geel shubo. Qofka nuucaadii uu gacan iyo garab qabad waayo xanuun ceynkee ah ayuu dareemayaa? Xanuunka uu dareemayo mid la mid ayuu sheeganayaa curiyaha gabaygani.

1. Waxaan ahay nimuu oon gubay, oo webi ku gees yaale
2. Waxaan ahay gasiin ruux cuno, gaajo wayn qaba e
3. Waxaan ahay nimaan guran karayn, miraha geedkaase
4. Waxaan ahay nimuu galay jacayl, oon geyaan heline

5. Gacan adoo ka naafo ah hadduu, galo kalkii geelu
6. Gurran iyo galoofkiis haddaad, meel isugu geyso
7. Gudcur maararowlaa haddaad, guure ugu jiiddo
8. Giddigii habeenkaas waxaad, gama`a diiddaa ba
9. Waxaad heeso kala gaara iyo, gabay u qaaddaa ba
10. Gudguduudka oogtiyo markuu, galac yiraa waagu
11. Ka gadaal haddaad ceel biyo leh, gaadho sabadiisa
12. Nimaan laba gacmoodini ma shubo, geel la soo horaye
13. Haddii aadan wadaan gelin karayn, garabna aad weyso
14. Ciil kugu garooriyo illeen, gocosho dayn maysid

15. Aniguna geddii baan ahee, geliya maankiinna
16. Halkaan gaar islaa baan al`aan, gacan togaalaaye
17. Allow ii gargaar waadigii, gacanta waynaaye

18. Xilli gab ah cirkoo guray dhulkoo, geed ka bixi waayay
19. Oo xoolaha wixii gees lahaa, malaggu uu gaabshay
20. Gugii loo hamuun qabay muddee, Guulle laga tuugay
21. Haddii uu ka aarmoo galbeed, galabta loo jeedo
22. Gurgurshaa ninkii aan lahayn, gurada loo buuxsho
23. Oo awr uu ku guuriyo haddana, garab la siin waayo
24. Illeen gama`a uu diido iyo, gocosho deyn maayo

25. Aniguna geddii baan ahee, geliya maankiinna
26. Halkaan gaar islaa baan al`aan, gacan togaalaaye
27. Allow ii gargaar waadigii, gacanta waynaaye

28. Wuxuu malabku kuu galo ayaad, gebi taqaanniine
29. Shinnidii gobta ahayd haddey, meel isugu geyso
30. Gaaggurkiyo godkeedii markaad., adigu soo gaarto
31. Haddaad gudin la`aan noqoto eed, goosan kari wayso
32. Ciil kugu garooriyo illeen, gama` dayn maysid

33. Aniguna geddii baan ahee.Geliya maankiinna
34. Halkaan gaar islaa baan al`aan.Gacan togaalaaye
35. Allow ii gargaar waadigii. Gacanta weynaaye

gabaygaan waxaa tiriyay Abwaan Calinuur Shiine